عارف پروہنا
دکھاں دی سولی چڑھے غریب
وختاں نوں ہین پھڑے غریب
سدا میں ایہو خبراں سنیاں
جھگیاں دے وچ سڑے غریب
رات دنیں پیا محنت کردا
بھکھ دے نال پیا لڑے غریب
اپنے بچے ویچن دے لئی
چوکاں دے وچ کھڑے غریب
اپنے حق لئی مظاہرہ کر کے
جیلاں دے وچ تڑے غریب
چُلے چڑھے دودھ وانگوں
شام سویرے کڑھے غریب
جد وی جنگ مُلکاں وچ لگے
سب توں پہلاں مرے غریب
میری دعا اے سچیا سائیاں
اسمبلی وچ وی وڑے غریب
ہوئی تعلیم وی کاروبار
کیویں ایتھے پڑھے غریب
جیٹھ ہاڑ دیاں دھپاں ساڑن
پالے وچ وی ٹھرے غریب
ساڈے گھر نہیں پروہنا آندا
ہو گئے آں اسیں بڑے غریب
کور فوٹو: ۲۰۱۵ میں سی ڈی اے کی طرف سے آئی الیون کچی بستی گرائے جانے کا منظر
